“المذهب الحريري “…بقلم المستشار قاسم حدرج / @HLWvlhSeBprRpdX

يا سيد مشنوق بدك شوي علينا تروق مش كل ما حدا حكي سياسي بيحمر وجهك وبتنط من رقبتك العروق وبتفقع تصريح من ورا الضريح متل الديك لعم يصيح قبل الشروق وبتتسلح بمذهب اهل السنة وكأنو الحريري عمر الفاروق لا يا مشنوق بدك تروق
ورح نذكر الناس بهاللهفة السنية يلي ما بتطلع الا بالمناسبات وكأنو قبل الحريري ما حدا مات ورح تضطرنا نفتح لهيدا الموضوع ملفات .
السني رشيد كرامي اغتالوا مجرم حرامي ليش عملتو معو تحالفات
ومعروف ومصطفى وأسامة سعد سنة اشراف وما في حدا ينكر اديش هني نضاف والناس بصيدا بتحملهم علكتاف لا شافو من شهيدك لا عدل ولا انصاف وفضل عليهم مصرفي او صراف .
والسني مصطفى حمدان يلي هوي للوطنية والرجولة عنوان تأمرتوعليه ورميتو اربع سنين خلف القضبان وبدالو حطيتو بالبرلمان ابو ضحكة جنان طبيب الاسنان يلي بسبعة ايار هرب بتياب النسوان.
وسليم الحص الرجل التقي الخجول ما راعيتو معو الاصول وخليتو ببيروت رجل مجهول واستبدلتو تاريخو المشرف يلي بينكتب عنو الاف الفصول وفضلتو عليه تنورة غنوة جلول
يا مشنوق بدك تروق ولك انتو حتى لما شارلي ايدو اهان الرسول
ما سمعنا منكم حتى استنكار خجول ومشيتو مع اصحاب العقال البلا عقول بجنازتو صف اول وحطيتو بجريدتكم وتلفزيونكم شعار كلنا شارلي ولك يا عيب الشوم شو بدنا بعد قول .
يا مشنوق هيدا رفيق سعد الدين مش صلاح الدين يلي ولا مرة سمعنا حدا رد عالمهاجمين انو رمز من رموز الدين وأنو اهانتو فيها اهانة للسنة لأنو تاريخو بيدافع عنو مش لأنو انجازوا الوحيد انو كان من اصحاب الملايين .
يا مشنوق اترك الساحة السنية ليلي حاملين لواء عزتها وما اكترهم
ونصيحة مني لا بقى تصادر هالطائفة المقاومة وتحطها ببيت الحريري وفيك اذا بدك تعمل الى جانب المدارس السنية الاربعة
مدرسة السنية الحريرية وما تدفع مصاري وخلينا نشوف كم سني رح يكون من اتباع هالمدرسة وانا بأكدلك انو ولا حدا .
الضعيف وحده يتلطى خلف الشهادة والمذهب ومن لا يملك حاضرا ولا مستقبلا يزحف نحو الماضي ويتلاعب بالغرائز .
بدك تروق يا مشنوق فيلمك صار محروق وقميص عثمان على اد ما استعملتو صار مخزوق ، بدك تروق .

 

 

 

ليبانون توداي /12/3/2018

أضف تعليق

اترك رد

جميع الحقوق محفوظة © جريدة لبنانون توداي 2017

تصميم وبرمجة قمة سوفت

%d مدونون معجبون بهذه: